ཕྱི་ལོ་ ༢༠༡༧ ཟླ་བ་ ༣ ཚེས་ ༡ རབ་བྱུང་བཅུ་བདུན་པའི་མེ་བྱ་མཆུ་ཟླའི་ཐབས་ཕྱོགས་བཟང་དང་པོའི་ཉིན་ཕྱི་དྲོ་དུས་ཚོད་བདུན་དང་ཕྱེད་ཐོག་དཔལ་༸རྒྱལ་དབང་ཀརྨ་པ་མཆོག་བཞུགས་གནས་གཏེར་སྒར་དགོན་ནས་སྨོན་ལམ་གསུང་ཆོས་ར་བར་ཞབས་སོར་འཁོད་དེ་ཞབས་སྟེགས་ཁག་གཉིས་བསྒྲོན་པའི་གཡས་ཕྱོགས་སུ་བཞུགས་ཤིང་། གཡོན་ཕྱོགས་སུ་ཧོང་ཀོང་ནས་ཕེབས་པའི་རྒྱའི་བླ་ཆེན་དེ་ཉིད་བཞུགས་ རྟིང་གཙུག་ལག་དང་ཆོས་འཁོར་གྱི་སྲུང་མ་བཀྭན་ལའོ་ཡེ་ཞེས་པའམ་སངྒྷ་རཱ་མའི་གསོལ་མཆོད་བྱ་ཚུལ་ཐུན་མོང་མ་ཡིན་པ་ལྷ་གླིང་གི་ཅོང་སྒྲ་ཞེས་པ་དེ་བཞིན་མགོན་པོ་མཆོག་དང་རྒྱའི་བླ་མ་ཧོང་ཀོང་ནས་ཆེད་ཕེབས་རྣམ་གཉིས་ཀྱི་དབུས་པའི་རྒྱའི་གྲྭ་བཙུན་རྣམས་དང་། དེ་བཞིན་འབྲུག་གི་སྒྲུབ་སྡེ་ཡིད་འོང་དཔལ་མོ་ཆོས་ཀྱི་ལྡིང་ཁང་གི་བཙུན་མ་རྣམས་དང་ཁྲ་འགུ་ཏཱ་རཱ་ཨ་བྷ་ཡའི་བཙུན་མ་ཐུན་མོང་ནས་ནས་རྔ་དང་རོལ་མོ། སིལ་སྙན་ཏིང་ཤགས་དང་བཅས་པས་པའི་སྒོ་ནས་གསོལ་མཆོད་ཤིན་ཏུ་སྙན་ཅིང་འཇེབས་པའི་སྒོ་ནས་གདངས་དབྱངས་སུ་གྱེར། གཞན་ཡང་བཀའ་བརྒྱུད་སྨོན་ལམ་གསུང་ཆོས་ར་བར་བླ་སྤྲུལ་རྣམ་པ། མཁན་པོ་དང་སྒྲུབ་བླ་རྣམ་པ། དགེ་ཚུལ་སློང་གི་རབ་བྱུང་དང་བཙུན་མའི་འདུས་སྡེ། རྒྱལ་ཁབ་དུ་མ་ནས་ཕེབས་པའི་ཕྱི་ནང་དད་ལྡན་མི་རིགས་སྣ་ཚོགས་འདུས།

བདག་ཅག་རྣམས་ཀྱི་འདྲེན་མཆོག་དམ་པ་ཁྱབ་བདག་འཁོར་ལོའི་མགོན་པོ་ཀརྨ་པ་སྐུ་ཕྲེང་གཉིས་པ་གྲུབ་ཆེན་པཀྵི་ནས་བཟུང་སྐུ་ཕྲེང་ལྔ་པ་དེ་བཞིན་གཤེགས་པ་རིན་པོ་ཆེ་ཆོས་ཀྱི་རྒྱལ་པོའི་བར། རྒྱ་ཧོར་གྱི་གོང་མ་རྣམས་ཀྱི་དབུ་བླ་མཛད་ནས་དམ་པའི་ཆོས་ཀྱི་འཁོར་ལོ་བསྐོར། རྫུ་འཕྲུལ་གྱི་བཀོད་པ་ངོ་མཚར་ཅན་དཔག་མེད་མཐོང་ཆོས་སུ་བསྟན་པས། མངའ་རིས་ཀྱི་རྒྱལ་ཁམས་དག་ལ་དཀར་ཆོས་ཀྱི་མཛད་འཕྲིན་དཔེ་མེད་བྱུང་བས་དཔུང་དང་གྲོགས་དན་གྱི་ཚུལ་དུ་བཀུར་བར་གྲགས་པ། ཙི་ནའི་ཡུལ་གྱི་བསྟན་སྲིད་ཐུན་མོང་བའི་ཆོས་སྐྱོང་བཀྭན་ལའོ་ཡེ་ཞེས། ལོ་ལྟར་གནམ་ལོ་གསར་ཚེས་ཀྱི་ཚེས་གཉིས་ཉིན་རྗེ་ཀརྨ་པ་དབུ་བཞུགས་ཐོག་རྒྱགས་བརྔན་གསོལ་མཆོད་ཟབ་སྨིན་ཐེངས་རེ་གནང་སྟེ། རྒྱ་བོད་ཡུལ་གྲུ་ཀུན་ཏུ་སངས་རྒྱས་ཀྱི་བསྟན་པ་སྲུངས། མཆོད་ཡོན་གྱི་སྐུ་ཚེ་སྲིངས། འགྲོ་བ་རྣམས་བདེ་སྐྱིད་ལ་འཚོ་བའི་འཕྲིན་ལས་གཡེལ་བ་མེད་པར་སྒྲུབ་དགོས་པའི་བཀའ་བསྒོས་དང་བསྔོ་སྨོན་རྒྱས་འདེབས་བཅས་གནང་སྲོལ་ཡོད།

༸རྒྱལ་དབང་བཅུ་བདུན་པ་མཆོག་བོད་ནས་ཕེབས་སྐབས་ཉེ་གནས་འགའ་ཞིག་ནས་སྔར་ལུགས་ལྟར་སྐྱོང་དགོས་ཚུལ་སྙན་གསེང་ཞུས་པས། ༸རྒྱལ་དབང་མཆོག་ནས་གསོལ་མཆོད་གསར་པ་ཞིག་མཛད་དེ་ཉིད་འདོན་སྐབས་སྒོའི་ཕྱིར་འདོན་པ་ཙམ་ལས་ལྷ་ཁང་ནང་དུ་འདོན་སྲོལ་མེད། འདོན་མཁན་ཡང་སྔར་༸རྒྱལ་དབང་མཆོག་གིས་དབུས་པས་རྩེ་གསོལ་ཐབ་པའམ་སྐུ་མདུན་པ་འགས་འདོན་པ་ལས་གཞན་ནས་མི་འདོན། དེ་ཉིད་ཀྱི་དབུ་མཛད་ཀྱང་སྔར་ལུགས་ལྟར་ན་བླ་བྲང་གི་ཕྱག་མཛོད་ནས་བགྱིད་དགོས་ཚུལ་གྱི་གཏམ་རྒྱུན་ཡོད། མཆོད་པ་གཤོམ་ཚུལ་ཡང་རྒྱ་ནག་གི་ལུགས་ཏེ་རྒྱ་ཇ་ལྡུགས་པ་དང་། བཏུང་བ་གྱ་ནོམ་པའི་གསེར་སྐྱེམས། རྒྱའི་སྤོས་བདུག །དེ་བཞིན་ཤོག་སྦག་ཀྱང་མང་དུ་སྤར་སྲོལ་ཡོད།         བསྟན་འཛིན་རྣམ་རྒྱལ་ནས།

སྤྱི་ལོ་༢༠༡༧ཟླ་༢ཚེས་༢༨བོད་མེ་བྱ་ལོ་ཟླ་བ་དང་པོའི་ཚེས་གཉིས་ཀྱི་དགོང་མོར་༸རྒྱལ་དབང་ཀརྨ་པ་སྐུ་ཡི་ཕྲེང་བ་འཛིན་པ་བཅུ་བདུན་པ་ཆེན་པོ་མཆོག་གི་དབུས་པས་སྐྱབས་རྗེ་རྒྱབ་ཚབ་རིན་པོ་ཆེ་དང་འདུས་མང་སེར་སྐྱ་ཡོངས་བཞུགས་གྲལ་དུ་འཁོད་ཟིན་རྗེས་རྗེ་དུས་གསུམ་མཁྱེན་པའི་ཐུགས་དམ་ལྔ་ཚན་ལྔ་ལས་བདེ་མཆོག་ལྷ་ལྔའི་མངོན་པར་རྟོགས་པ་རྗེ་ཀརྨ་པ་བརྒྱད་པས་མཛད་པའི་ཚོགས་འཁོར་དང་འབྲེལ་བའི་ཕྱི་དྲོའི་གསོལ་ཚིགས་དང་སྲོལ་རྒྱུན་གླུ་གར་གྱི་མཆོད་བསྟོད་ཕུལ།དེ་ཡང་གླུ་གར་གྱི་མཆོད་བསྟོད་ཕུལ་བའི་དགོས་པ་ནི་ཧི་མཱ་ལ་ཡའི་རི་རྒྱུད་ཀྱི་སྲོལ་རྒྱུན་རིག་གཞུང་མི་ཉམས་པ་དང་།གྲུབ་མཐའ་ལ་ཞུགས་མ་ཞུགས་མང་པོ་ཞིག་གིས་མིག་ཡིད་རྣ་བའི་དགའ་སྟོན་ལ་རོལ་ནས་དགའ་སྐྱིད་སྤྲོ་སྣང་གི་མེ་ཏོག་གསར་དུ་བཞད་ཐུབ་པ་དང་། ཆོས་ཕྱོགས་ནས་ཀྱང་བཅོམ་ལྡན་འདས་ཀྱིས་མདོ་ཏིང་ངེ་འཛིན་གྱི་རྒྱལ་པོ་ལས།གླུ་གར་བཟང་པོ་སྣ་ཚོགས་མང་པོ་དང་།།ཡིད་གཙང་བཞད་གད་རོལ་མོ་སྣ་ཚོགས་དང་།།རྟག་པར་མར་མེའི་ཕྲེང་སྡུག་བཟང་པོ་ཡིས།།མཚུངས་པ་མེད་ལ་མཆོད་བཟང་རབ་ཏུ་གྱིས།།ཞེས་གདམས་པ་ལྟར་རྒྱལ་བ་དགྱེས་པའི་མཆོད་སྤྲིན་དུ་གྱུར་གྱི་ཡོད་པ་སོགས་དགོས་ཆེད་དུ་མར་དམིགས་ཏེ་ཐོག་མར་སྐུ་ཞབས་ཤེས་རབ་མཐར་ཕྱིན་དང་དངོས་གྲུབ་ཚེ་རིང་རྣམ་པ་གཉིས་ཀྱིས་བོད་དབྱིན་གཉིས་ཀྱི་སྐད་ཐོག་ནས་སྒར་ཆེན་ལོ་སར་དང་སྲོལ་རྒྱུན་གླུ་གར་དང་འབྲེལ་བའི་ལོ་རྒྱུས་དང་བྱུང་རབས་དགོས་ཆེད་སོགས་མཚམས་སྦྱོར་དང་སྦྱར་ཏེ་ངོ་སྤྲོད་རིམ་གྱིས་གནང་ཞིང་།རྡ་ས་ཟློས་གར་ཚོགས་པ་དང་།འབྲུགའབྲས་ལྗོངས།མོན་པ།ལ་དྭགས་སོགས་ནས་ཕེབས་པའི་གླུ་པ་གླུ་མ་དང་།ཟློས་གར་ཁང་རྣམ་པས་འཁྲབ་གཞས་དང་རྐྱང་གཞས་བར་བར་དུ་བོད་ནས་སྐད་གྲགས་ཅན་གྱི་གླུ་པ་གླུ་མ་ཁག་གཅིག་ནས་༸རྒྱལ་དབང་མཆོག་ལ་བསྟོད་གཞས་འོད་སྡེར་བོད་ནས་གསར་དུ་འབྱོར་བ་དང་སྦྱར་ནས་འདུས་མང་ཡོངས་ལ་གཟིགས་འབུལ་ཞུས་ཟིན་རྗེས་སྐུ་ཞབས་རྣམ་པ་གཉིས་ནས་བཀྲ་ཤིས་བསྔོ་སྨོན་གྱིས་མཇུག་བསྡུས།དེ་རྗེས་དབུ་མཛད་རྣམ་པས་བདེ་མཆོག་ཚོགས་འཁོར་གྱི་མཇུག་བཀྲ་ཤིས་བསྔོ་སྨོན་གྱིས་བརྒྱན་ཏེ་མཛད་སྒོ་མཇུག་ལེགས་པར་གྲུབ་བོ།།

གནས་ཚུལ་མདོར་བསྡུས་སུ་ལྷ་ཐོག་ཐུབ་སྦྱིན་ནས།

ཕྱི་ལོ་ ༢༠༡༧ ཟླ་ ༢ ཚེས་ ༢༨ སྒར་པའི་ལོ་གསར་ཉིན་གཉིས་པ་བཞུགས་གྲལ་ཆེན་མོའི་སྐབས། སྔ་དྲོ་དུས་ཚོད་བརྒྱད་པའི་ཐོག་དཔལ་༸རྒྱལ་དབང་ཀརྨ་པ་མཆོག་བཞུགས་གནས་གཏེར་སྒར་དགོན་ནས་སྨོན་ལམ་ཆོས་རར་རྒྱ་གླིང་སྤོས་སྣ་དང་བཅས་ཏེ་ཆིབས་སྒྱུར་བསྐྱངས། དེ་ནས་མི་འཇིགས་པའི་གསེར་ཁྲི་མངོན་པར་མཐོ་བའི་སྟེང་དུ་བརྗིད་ཉམས་བཅས་ཏེ་བཞུགས་པར་མཛད། བཞུགས་གྲལ་གཡས་སུ་༸སྐྱབས་རྗེ་རྒྱལ་ཚབ་རིན་པོ་ཆེ་དང་ཞི་བ་ལྷ་རིན་པོ་ཆེ་གཙོས་པའི་རྒྱ་གར་གཞུང་གི་སྣེ་ཤན་པ། བོད་གཞུང་གི་ཆོས་དོན་དྲུང་གཞོན། དགོན་སྡེ་ཁག་གི་ཕྱག་མཛོད་དང་། བླ་བྲང་ལས་བྱེད་རྣམས་དང་། བྱིན་བདག་རྣམས་ན་རིམ་གྱིས་བཞུགས། བཞུགས་གྲལ་གཡོན་དུ་ཡོངས་དགེ་མི་གྱུར་རིན་པོ་ཆེ་དང་འབོ་དཀར་ཆུང་སྲིད་རིན་པོ་ཆེ་དང་འབོ་དཀར་མཁན་རིན་པོ་ཆེ་གཙོས་པའི་དགོན་སྡེ་ཁག་གི་མཁན་སྤྲུལ་རྣམས་དང་། དེ་བཞིན་དབུ་རྡོར་ཆོས་གསུམ་རྣམས་ཀྱི་གྲལ་བསྟར་དྲང་པོར་བསྒྲིགས་ཏེ་འཁོད་པར་མཛད།

དེ་ནས་དབུ་མཛད་ཀྱི་ཚིག་བདུན་གསོལ་འདེབས་ཀྱིས་དབུ་བཟུང་སྟེ་ཕག་མོའི་བདུད་རྩི་ལག་མཆོད་བར་འདོན་པ་དལ་གྱིས་དབྱངས་དང་བཅས་ཏེ་ཕབ། དེའི་རྗེས་གསོལ་ཇའི་བར་མཚམས་སྐབས་བོད་གཞུང་ཟློས་གར་ཚོགས་པས་གར་གླུའི་གཟིགས་འབུལ་དང་། དེ་ནས་ཁྱིམ་པ་གཉིས་ནས་ཆོས་ཀྱི་འབྱུང་བ་བརྗོད་པའི་འབེལ་གཏམ་དང་། ཁྲ་འགུ་དགོན་གྱི་དགེ་འདུན་པ་རྣམས་དང་། འབྲུག་དཔལ་མོ་ཆོས་ཀྱི་ལྡིང་ཁང་གི་བཙུན་མ་རྣམས་ནསདབུ་མཛད་ཀྱི་དབྱངས་དང་བསྟུན་ནས་ཤོ་མོ་ཡར་ཤོག་མའི་མགུར་གསུངས། དེའི་མཇུག་ཏུ་གདན་ས་ཤེས་རབ་གླིང་དང་མི་རིགས་བཤད་གྲྭའི་དགེ་འདུན་པ་གཉིས་ནས་སེམས་བསྐྱེད་དང་འབྲེལ་བའི་ཚོགས་ལངས་ཀྱི་རྒལ་བརྟག་མཛད།

མཇུག་ཏུ་དབུ་མཛད་རྣམས་ཀྱིས་དུས་མཁྱེན་སྐུ་བསྟོད་ནས་བདེན་གྲུབ་མ་བར་ཚོགས་འདོན་མཛད་ཅིང་མཐར་བཞུགས་གྲལ་པ་རྣམས་ཀྱིས་སྡེར་ཁ་བསྡུས་རྗེས་སྔ་དྲོའི་མཛད་སྒོ་རེ་ཞིག་གྲོལ། བསམ་གཏན་མཐར་ཕྱིན་ནས།

སྤྱིར་སྒར་པ་ལོ་གསར་རྒྱས་པ་ནི་ཀརྨ་པ་སྐུ་ཕྲེང་བདུན་པ་རྗེ་ཆོས་གྲགས་རྒྱ་མཚོའི་སྐབས་ནས་དར་སྲོལ་ཆེན་པོ་བྱུང་ཡོད། དེ་སྔ་ཡང་བཀའ་བརྒྱུད་སྨོན་ལམ་གྱི་དུས་སྐབས་དང་སྟབས་བསྟུན་གནས་མཆོག་རྡོར་གདན་དུ་དེ་སྔ་ལོ་གསར་ལན་གཉིས་ཙམ་བཏང་ཟིན། འདི་ལོ་རབ་བྱུང་བཅུ་བདུན་པའི་མེ་བྱ་རང་ཞལ་གནམ་ལོ་གསར་དུ་བཞད་སྐབས་སྔར་རྒྱུན་དང་མི་མཚུངས་པ་དམིགས་བསལ་ཞིག་ཡོད་པ་ནི། ཚེས་གཉིས་ཉིན་དགོང་དྲོའི་གསོལ་ཚིགས་དང་ལྷན་དུ་འཁྲབ་སྟོན་ཡང་མཛད། རྗེ་བདུན་པའི་སྐབས་སྒར་པ་ལོ་གསར་ཞེས་ཉིན་བཅོ་ལྔའམ་ཟླ་ངོ་ཙམ་རིང་འཁྲབ་སྟོན་བགྱི་སྲོལ་ཡོད། འཁྲབ་སྟོན་པ་ཕལ་ཆེ་བ་རྟེན་ཁྱིམ་པ་རྣམས་ཀྱིས་འཁྲབ་སྟོན་མཛད་པ་ལས་དགེ་བཙུན་རྣམས་ཀྱིས་འཁྲབ་སྟོན་མཛད་པ་ཆེས་དཀོན། དེ་སྔ་རང་རེ་རྣམས་ནས་ལོ་གསར་ལན་འགའ་བཏང་ཡང་འཁྲབ་སྟོན་རྒྱས་པ་བྱ་མྱོང་མེད། འདི་ལོ་མེ་བྱ་གནམ་ལོ་གསར་ཚེས་ཀྱི་མཛད་སྒོ་དང་འཁྲབ་སྟོན་རྒྱས་པ་གཉིས་ཀ་ཡོད་ཅིང་། འཁྲབ་སྟོན་དེ་ཡང་སྲོལ་རྒྱུན་གྱི་ཐུན་མིན་རིག་གཞུང་གི་འཁྲབ་སྟོན་ལས་དེང་དུས་ཀྱི་ལམ་སྲོལ་དང་མཐུན་པའི་འཁྲབ་སྟོན་མིན།                                                                                                                  དེ་ཡང་འཁྲབ་སྟོན་མཛད་མི་གཙོ་བོ་བོད་གཞུང་ཟློས་གར་ཚོགས་པ་དང་། འབྲེལ་ཡོད་ཀྱི་འཁྲབ་སྟོན་མི་མཚུངས་པ་རྣམ་གྲངས་ལྔ་དྲུག་ཙམ་ཡོད། དེ་ཁོངས་སུ་ལ་དྭགས་ནས་ཡིན་པའི་བུ་ཞིག་གི་རྐྱང་གཞས་དང་། དེ་བཞིན་སྨན་ལྗོངས་འབྲུག་ཡུལ་ནས་ཡིན་པའི་ཕོ་མོ་རྣམས་ནས་འབྲུག་གི་ཐུན་མིན་གླུ་དབྱངས་དང་འཁྲབ་སྟོན་ཟུང་དུ་བགྱིས། གཞན་ཡང་རྒྱ་གར་མངའ་སྡེའི་ཆ་ཤས་མོན་རྟ་དབང་ཁུལ་ནས་གཞས་པ་འགས་སྙན་འཇེབས་ལྡན་པའི་གླུ་གར་གྱི་མཆོད་སྤྲིན་སྤྲོ་བར་བྱས།  ལྷག་པར་གངས་ལྗོངས་གཞས་པ་གྲགས་ཅན་འགས་བརྙན་འཕྲིན་གྱི་ལམ་ནས་༸རྒྱལ་དབང་མཆོག་གི་སྐུ་བསྟོད་དང་འབྲེལ་བའི་གླུ་དབྱངས་སྙན་འཇེབས་ལྡན་པ་སྔ་ཕྱིར་ཁག་བཞི་ཙམ་གྱེར།                                                                                                མཛད་སྒོའི་སྐབས་མཚམས་སྦྱོར་གྱི་ངོ་སྤྲོད་བོད་སྐད་ནང་མཛད་པོ་ར་ལང་ཕྱག་མཛོད་སྐུ་ཞབས་ཤེས་རབ་མཐར་ཕྱིན་དང་། དབྱིན་ཇིའི་སྐད་ཡིག་ནང་མཚམས་སྦྱོར་ངོ་སྤྲོད་མཛད་པོ་སྐུ་ཞབས་དངོས་གྲུབ་ཚེ་རིང་རྣམ་གཉིས་ཡིན།                                                                 འཁྲབ་སྟོན་དེ་དག་དེར་འདུས་གཟིགས་མོ་བ་ཀུན་གྱི་སྤྱན་ལམ་དུ་ཡིད་འཕྲོག་ཅིང་ཕུན་སུམ་ཚོགས་པའི་དཔལ་དང་ལྡན་པས་ལྟད་མོ་བ་ཡོངས་ཀྱི་སྤྲོ་བ་རབ་ཏུ་བརྟས། དེ་བཞིན་ཕྱི་དྲོའི་དུས་སུ་ཡི་དམ་འཁོར་ལོ་བདེ་མཆོག་གི་ཚོགས་འཁོར་དང་འབྲེལ་བའི་དགོང་ཚིགས་ཀྱང་འདུས་པ་ཀུན་ལ་འབུལ་གཤོམ་མཛད། མདོར་ན་གླུ་ཡི་མཆོད་པ་འབུལ་རྒྱུ་དང་། གར་འཁྲབ་རྒྱུ་གཉིས་ཀ་གསང་སྔགས་བླ་མེད་དང་འབྲེལ་ལམ་མཚོན་པ་ཡིན། བསྟན་འཛིན་རྣམ་རྒྱལ་ནས།